Мечта о русском единстве. Киевский синопсис (1674)
Шрифт:
О АФРИЦЕ.
АФРИКА ТАКОЖДЕ часть есть всея земли, назвася от Афра, единаго из племени Авраамова. Иныи сказуют, яко наречеся Африка, аки бы Априка по толкованию Словенскому отверзтая; есть бо отворена и паче иных обращена к солнцу, образом же треугольна; от полунощи определяется морем Влоским, от запада и полудне Окианом, от Востока Чермным морем. Ту Египет, Ефиопия, Кафрария, страна Муринска, Мавритания, Нубия, Ливия, Варвария, и Царства Фессинское, Маррохинское, Моногумугов, Мономотапов, Адель, Конго и прочая.
О ЕВРОПЕ.
ЕВРОПА ЕСТЬ часть округа земнаго, яже в долготу идет от предела Португалии до реки Танаис или Дону; в широту же от Архипелага, сиречь междуземнаго моря до Окиана Гибернитскаго; содержит в себе преславныи и крепкии Государства, богатства, и велие множество людей храбрых, сильных и мудрых, и к обитанию есть здрава и добра; в ней Греция, Фракиа, идеже Константинополь; Таврика, идеже Татаре Перекопскии, Славяне, Русь, Москва, Польша, Литва, Мазовша, Жмудь, Курляндиа, Лифлянты или
5.
О НАРОДЕ РУССКОМ, ИЛИ СВОЙСТВЕННЕЕ РОССИЙСКОМ,
и о наречии, или названии его.
PУССКИИ ИЛИ ПАЧЕ Российскии народы тыижде суть Славяне. Единаго бо естества, отца своего Афета, и тогожде языка. Ибо яко Славяне от славных делес своих искони Славенское имя себе приобретоша, тако по времени от россеяния по многим странам племени своего, РОССЕЯНЫ, а потом РОССЫ прозвашася. Неции близ мимошеших времен скадоваху Россов от городка Русы, недалече Великаго Новгорода лежаща; иныи от реки Роси; друзии от русых волосов, с яковыми и ныне везде много суть Руси. Но паче всех тех подобий достовернее и приличнее от розсеяния своего Россы имя то от древних времен себе стяжаша. Ибо на широкой части света по многим различным странам, иныи над морем Черным, Понтским Евксином, иныи над Танаис или Доном и Волгою реками, иныи над Дунайскими, Днестровыми, Днепровыми, Десновыми берегами, широко и различно селеньми своими россеяшася. Тако все древнии Летописцы Греческии, Российскии, Римскии и Польскии свидетельствуют; наипаче и Божественное Писание от пророчества Иезекиилева в главе 39. имя тое Россов приличнее изъявляет, нарицающе Князя Ро с , Мосох и прочая. И тако РОССЫ от россеяния своего прозвашася, а от Славянов именем точию разнствуют; по роду же своему едино суть, и яко един и тойжде народ Славенский, нарицается Славеноросский или Славноросский.
6.
О НАРОДЕ САРМАТСКОМ
и о наречии его.
САВРОМАЦИИ, ИЛИ САРМАЦИИ страна есть вся в тойже Европе, третией части Света, жребия Афетова, обаче сугуба есть: едина Скифска, идеже ныне сидят Скифы или Татаре; вторая, идеже Москва, Русь, Поляки, Литва, Прусы и прочая обитают. Савромация прозвася Гречески от народа имуща подобие ехидниных или ящурчих очес. Ибо ехидна Геречески саврос, а око омма нарицается. Обаче толиким странным наречием не конечне естество очес, но паче страх и мужество онаго народа Сарматскаго изобразуется; зане прежде вся земля от сих людей трепеташе. Иныи Летописци род Сарматов производят от Асармофа, или от Сармофа, праправнука Арфаксадова, сына Симова. Инии от Рифада, внука Афетова, того ради, яко Асармофа и Рифада племя совокупившеся купно обиташе, откуду под тем Сарматским именем все прародители наши Славенороссийскии, Москва, Россы, Поляки, Литва, Поморяне, Волынцы и прочая заключаются. Понеже и Сарматов такожде, яко и Россов от места на место преносящимися и роспрошенными и россеянными Гречестии древни Летописцы с Российскими и с прочими согласно нарицают.
7.
О НАРОДЕ РОКСОЛАНСТЕМ
и о наречии его.
ОТ ТЕХ ЖЕ САРМАТСКИХ и Славяноросских осад тойже народ Росский изыйде, от негоже неции нарицахуся Россы, а иныи Аланы, а потом прозвашася Роксоланы, аки бы Росси и Аланы. Понеже все Летописцы всех тех народов предреченных наречием паче, нежели естеством разделяют, Афетово вящше племя быти поведающе, и Сармофа праотца Мосоха сына его нарицающе; ибо тыяжде народы Славенороссийскии, по времени умножающеся, и по различных местех вселяющеся, еще и иными различными имены от рек, лесов, приметов, поль, от дел, и от Князей своих имен и наречий, прозваны быша, якоже Болгары и Волынцы от реки Волги; Муровляне от реки Муравы, или от князя Мораша; Полочане, от реки Полоты; Донцы от Дону; Запорожцы от Запорожья; Козаки от славнаго своего древняго некоего вожда прозвищем Козака, победивше с ним Татаров, прозвашася; Древляне или Полесяне от древес, или от лесов густых; Поляне, или Поляки от Поль; Половцы от лова зверина и от плену людей; Печенези от жестокости и мучительства своего; Татаре от реки Тартар. А тыиж народы Татарскии, егда поседоша страну Фракийскую, идеже Константинополь и прочии грады, прозвани бяху от Фраков, тоесть от жителей страны нарицаемой Фракия, Труки, а потом преложением двоих словес азбучных Турки прозвашася. Скифи, тыиж Татаре от горы Скифи нареченны суть; зане под тою горою яко и Кавказскою сначала обитаху; Северяне от страны Северския над Десною и Сеймом реками седшия; Литва от Литвоса сына Царя Вейдевута Прусскаго; Чехи от Чеха Князя; Ляхи или Лехи от Леха перваго Короля Польскаго; Москва народ от Мосоха праотца своего и всех Славенороссов, сына Афетова: и царствующий град Москва от реки Москвы, и прочая сим подобная.
8.
О МОСОХЕ, ПРАРОДИТЕЛЕ
и о племени его.
МОСОХ, ШЕСТЫЙ сын Афетов, внук Ноев, толкуетжеся от Еврейска Славенски вытягающий и ростягающий, от вытягания лука и от расширения великих и множественных народов Московских, Славенороссийских, Польских, Волынских, Чешских, Болгарских, Сербских, Карвацких и всех обще, елико их есть, Славенска языка природне употребляющих. Той бо Мосох по потопе лета 131. шедши от Вавилона с племенем своим, абие в Азии и Европе над брегами Понтскаго или Чернаго моря народы Мосховитов от своего имени осади, и оттуду умножшуся народу, поступая день от дне в полунощныя страны за Черное море, над Доном и Волгою реками, и над езером или отногою морскою Меотис, идеже Дон впадает, в полях широко селеньми своими распространишася, по свойству и истолкованию имени отца своего Мосоха. Ибо, яко Афет толкуется разширение, или разширителен; тако подобне сказуется и Мосох ростягающий и далече вытягающий. И тако от Мосоха, праотца Славеноросскийскаго, по наследию его, не токмо Москва народ великий, но и вся Русь или Россия вышереченная произыде, аще в неких странах мало что в словесех и применися, обаче единым Славенским языком глаголют.
9.
О НАРЕЧИИ МОСКВЫ
народа и Царственнаго града.
НАРЕЧИЕ ТО МОСКВА, от имени праотца Мосоха изшедшее, аще оно искони вестно древним Летописцем бе, обаче на мнозе и в молчании пребываше. Ибо егда трие братия Князие Варязстии, о них же будет нижае, и Великая Княгиня Ольга, или Елена, и всея России первый Самодержец Владимир и вторый Мономах, Россиею обладаша, тогда Россами или Русаками звахуся; а в Российских Землях точию Киевский, Владимирский, Великоновгородский, Черниговский, Галицкий, Славенский, и прочии Князи имениты бяху. Москва бо город над рекою Москвою, от имени ея нареченный, наипервее из древа создан бысть и незначен даже до Великаго Князя Иоанна Даниловича, иже Престол Княжения от Владимира града в Москву град пренесе.
И тако величеством славы Престола Княжения от Владимира града пренесеннаго, Богоспасаемый град Москва прославися, и прародительное в нем имя Мосоха в народе Российском обновися, еже неувядаемою в веки памятию цветущи, изряднееже благодатию Божиею от силы в силу и от славы в славу преспевая, на высочайший степень самодержавнаго Царствия востече и благочестием, силою и мужеством православных Царей, найпаче великими чудесы Святых Российских Московских Чудотворцев, на высоту добродетелей возвысившися, яко солнце по Вселенней просветися, и паче иных сияет.
10.
О КОЗАРЕХ.
КОЗАРЫ ЛЮДИЕ откуду бы конечне с сицевым своим именем изошли, известие Летописцов о том несовершенно: обаче и сих людей Русских же народов быши непщуют; их же Великий Князь Светослав Игоревич отторгнувшихся из под его власти паки под свою власть воинскою силою подби, доставши и главны города их прозываемаго Беловес или Белая Вежа.
11.
О ЦИМБРАХ.
ЦИМБРЫ РОДСТВО свое имеют от старейшаго сына Афетова Гомора, от негоже наперва нарицахуся Гоморы, Гречески именовашася Кимеры или Цимблеры; потом прозваны бяху Цимбры. Размножившежеся по родом своим, иныи седоша в полях диких, иныи над Доном и Волгою реками, иныи над Богом рекою, иныи над Днепром, над Десною, Сосною, и над иными реками, иныи над Черным морем, идеже Очаков, Крым, Перекоп, и над езером Меотис; иныи же седоша, идеже Волынь, Подолье, Подляшье, Жмудь и Литва. Ибо от тех же Цимбров и Литовский народ изыйде. От тогожде Цимбрийскаго народа изшедшии людие по временем нареченны бяху, иныи Готами, Епидами, прочии Половцами, Ятвягами и Печенегами. Но все тии Цимбры бяху народы воинскии, мужественныи; и егда от полунощных стран, найпаче идеже ныне Литва, Прусы и Шведы, ради неплодствия земли поидоша до Франции и Испании, потом оттуду до Волох, или до Римлян; Римлянеже им не хотяху земли дати; они брань сведши с Римляны, многажды побеждаху Римлян, и селения своя разширяху и распосаждахуся, яко же хотяху. Потом нескоро, егда в тех изобильных странах пожившее в мире, разбогатеша, и к воинским делам разленишася, внезапу от некоего вожда Римскаго, именем Мария, нещадно побежденны бяху; сего ради ослабевшии в то время Цимбры в силах своих паки возвратишася в страны полунощныя, и седоша по различных местах и странах над вышереченными реками. Все же верою порознишася, инии Христиане, инии погане оставше.
12.
О ПРЕСЛАВНОМ ВЕРХОВНОМ И ВСЕГО НАРОДА РОССИЙСКАГО ГЛАВНОМ ГРАДЕ КИЕВЕ и о начале его.
ПРЕСЛАВНЫЙ ГРАД Киев коего бы лета искони основался, в многих Летописцех Русских несть числа, точию сице его выводят известное начало, яко по вознесении Господа нашего Иисуса Христа на Небеса, егда благодать Духа Святаго Апостоли Святии приемше, разыдошася во всю землю проповедати Евангелие всей твари, к вере же Христовой и ко крещению обращати; тогда изрядный заступник наш Российский, Святый Апостол Андрей Первозванный, по жребию разсевая благоплодное семя Евангелия Господа нашего Иисуса Христа в Европе, пустися в Греческую землю, к Скифом, или Татаром; достигши же Херсона, увестися, яко близ есть устие реки Днепра, и хотя оттуду ити в Рим, поплы горе Днепра, и приближшися к горам высоким (идеже ныне Киев) ста под ними, и возшед на тежде горы, благослови их и Крест водрузи на месте, идеже по сем Церковь воздвижения Креста Господня сооружися, пророчески глаголя учеником своим: на сих горах возсияет благодать Божия, и будет град велик, и воздвигнет Господь Бог в нем множество Церквей. По сем отпустишися Днепром и прииде к Славяном, идеже ныне великий Новгород, и оттуду чрез землю Варяжскую пустися до Рима, о чем в житии его широчае.