Мечта о русском единстве. Киевский синопсис (1674)

Сапожникова И. Ю.

83.

О ПРИШЕСТВИИ ЗАХАРИИ

из посольства на Москву.

ЗАХАРИЯ ЖЕ ПРИИДЕ благополучно в славный град Москву и удари челом своему Государю, Великому Князю Димитрию Ивановичу, и всех Татар связанных приведоша ту. Князь же Великий радостен бяше вельми о возвращении Захариином и о умном посольстве его. Уведавши же известно от Захарии о неложном востании безбожнаго Мамая, и яко скоро грядет, нача радоватися наипаче и тешитися о Бозе, укрепляя брата своего и всех Князей Руских противу безбожнаго Мамая. Готовящижеся на брань, умысли ити в Монастырь Святыя живоначальныя Троицы на поклонение единому Богу, в Троице Святой славимому, и на восприятие благословения от Преподобнаго Отца Сергия чудотворца.

84.

О ПОХОДЕ ВЕЛИКАГО КНЯЗЯ

Димитриа в Монастырь Святыя Троицы.

ВЕЛИКИЙ КНЯЗЬ Димитрий, поем брата своего и вся православныя Князи, пойде к Монастырю Святыя живоначальныя Троицы к Святому Игумену Отцу Сергию; и тамо вшед в Монастырь, поклонися и благословение получи от всея Святыя Обители; и моли его Преподобный старец, дабы слушал Святыя Литургии. Бяше же тогда день недельный, и память Святых мученик Флора и Лавра. По Литургии моли его Преподобный Сергий с всею Братиею, дабы вкусил хлеба Святыя Обители. Князь же Великий препятие велие име, яко приидоша вестницы, возвещающе ему о приближении Татаров, и моли Преподобнаго, дабы ослабил ему; и рече ему Святый старец: обед тебе в поспешество будет; венец же тебе еще не готов, но иным многим венцы плетутся мученическии. Князь же Великий Димитрий с всеми православными Князьми вкуси хлеба; а Святый Сергий в то время повеле воду освятити от Мощей Святых мученик Флора и Лавра, их же того дне память совершашеся. По трапезе Преподобный Сергий окропи священною водою Великаго Князя и всех православных Князей и все Христолюбивое воинство, и даде Великому Князю знамение на челе, Крест

Христов, и рече ему: поиди, Господине! Бог тебе да будет помощник на враги. По сем тайно ему рече: победиши супостаты своя. Князь же Великий прослезися и проси от него дару. Отвеща Старец Святый: елико довлеет твоему Государству? и рече ему Князь Великий: дай ми, Святый Отче, два воина от полку своего иноческаго, Пересвета и брата его Ослебя, то ты и сам поможешь нам. Преподобный же старец скоро повеле има, яко ведомым ратником и храбрым богатырем, готовитися, а вместо тленнаго щита и шлема схиму с Крестом на главу возложити, и предаде их в руце Великому Князю глаголя: се ти мои оружницы, а твои извольницы; и рече им Святый старец: мир вам, Братия моя, страждите, яко доблии воины Христовы; и всему православному воинству дав мир и благословение и отпусти их. Князь же Великий обвеселися сердцем, и пойде к граду своему Москве, благословение старче, аки некое некрадомое сокровище несый. Достигши же града Москвы, иде к Преосвященному Митрополиту, и сказа ему, еже рече Святый старец, и како даде ему благословение и всему воинству. Митрополит же повеле ему все то хранити и не поведати никому же тайнаго Сергиева проречения о победе событися имеющей над поганами, дондеже время славы победительныя приидет.

85.

О ПОХОДЕ ВЕЛИКАГО КНЯЗЯ

Димитриа из Москвы противу безбожных Агарян.

МЕСЯЦА АВГУСТА в двадесят седмый день, на память Преподобнаго Отца нашего Пимина Великаго, Князь Великий Димитрий хотя ити на безбожнаго Мамая, пойде в Церковь Пресвятыя Богородицы, и став пред иконою Христа Спасителя, согну руце персем и нача молитися со слезами глаголя: молютися, Боже чудный, владыко страшный и превысокий! воистинну ты еси Царь славы. Помилуй нас грешных, егда в печалех к тебе прибегаем, яко к своему владыце и благодателю. Суди, Господи, обидящим мя и возбрани борющихся со мною; прииме оружие и щит и стани в помощь мне, и даждь ми победу на противныя, да и тыи познают славу твою. Потом ста пред образом чудотворным пресвятыя Богородицы, от Луки Святаго Евангелиста написанным, и нача умильным сердцем вещати глаголя: о Госпоже Царице Богородице, всего рода Христианскаго заступнице! не дай же в разорение града сего поганому Мамаю, и моли сына своего Господа нашего, Творца и Содетеля, да дасть нам руку помощи, да смирит сердце гордых врагов наших; можеши бо, о Владычице, елика хощеши. Мы же на твою помощь надеющеся, подвизаемся противу безбожных Татар. Такожде шедши и к гробу блаженнаго чудотворца Петра Митрополита Киевскаго, припаде и моли его, да помолится к Архиерею Христу Господу о словесных овцах паствы своея, еже сохранитися им неврежденным, и да проженет и погубит волков безбожных варваров, хотящих овцы его поглотити. Скончав же молитву, поклонися Митрополиту; Митрополит же благослови его, и давши ему знамение победы, Крест Святый, отпустил его. Но посла Митрополит Священный Собор с клиром в Флоровскии врата, в Константинопольскии и в Никольскии с Крестами Святыми и с чудотворными Иконами, да всех воинов благословят на брань. Князь же Великий Димитрий иде в Церковь Небеснаго Воеводы Святаго Архистратига Михаила, воином скораго пособника, и поклонися Святому его образу. Потом приступи к гробом православных Князей, прародителей своих, и рече: истинныи хранителие Веры святыя, православию поборницы! аще имате дерзновение к Господу, того молите о нас, наследниках ваших, да подаст нам Бог над погаными победу. По молитве изыде из Церкви; и се Княгиня Великая Евдокия и иных многих Князей Княгини и Воеводскии жены и многое множество народа, мужие и жены, изыдоша провождати Великаго Князя и прочих с слезами и с восклицанием сердца, еле можаху слово прорещи, подавающе всяк друг своему другу конечное целование. Князь же великий мало удержася от слез, не дая себе плакати народа ради; сердцем же горько слезящи, глагола к своей Княгине, утешая ю: жено! не плачь; аще Бог по нас, то кто на ны? И тако сотворши целование, всяде на свой бранский конь и с ним вси Князи, аки белыи соколы полетели из Москвы в нарочитом воинском наряде. Белоезерстии Князи особно выехали с своими полки зело пристроенными. Князь же Великий Димитрий отпусти брата своего Владимира дорогою на Брашево, яко не вместися все воинство единым путем: а Князи Белоезерстии Деревенскою дорогою; сам же Князь Великий пойде на Котел дорогою; а Княгиня Великая Евдокия и с снохою своею и с прочими Княгинями изыйде в златоверхий свой терем набережный смотрети на Князя, и пригнувши руце свои к персем, нача молитися к Богу, прося помощи на поганых Татар, и дабы два сыны Великаго Князя Димитрия, Василий и Юрий, не осиротели.

86.

О ПРИШЕСТВИИ ВЕЛИКАГО

Князя Димитриа на Коломну и о устроении полков.

ВЕЛИКИЙ КНЯЗЬ Димитрий пришел в субботу на Коломну, на память Святаго Моисея Мурина, Августа числа 28, идеже стретоша его многии Воеводы с воинством. Архиерей же Евфимий с освященным Собором и с Кресты стрете его в баште городовой (бастионе), и благослови Великаго Князя и всех с ним. Во утрие Великий Князь повеле всем Воеводам с войсками в поле Девиче выехати, и бяше толико великое воинство на полях Коломенских, яко очима созрети всего не мощно бяше; и постави Великий Князь над полками воевод. Себе в полк приял Князей Белоезерских; правую руку себе содела брата своего Князя Владимира, давши ему Ярославских Князей; а левую руку себе устроил Князя Глеба Брянского; передоваго полку Воевода Димитрий Всеволож, Коломенскаго же полку Микула Василиевичь, Володимирский Воевода Юрьевский Тимофей Волуевичь, Костромской Воевода Иван Радионовичь, Переяславский Воевода Андрей Серкозовский; а у Князя Владимира Воеводы, Данило Велевуж, или Белеутяк, Князь Феодор Елецкий, Князь Юрий Мещерский, Князь Андрей Муромский.

87.

О ПОСЛАНИИ СТРАЖЕВ ОТ ВЕЛИКАГО КНЯЗЯ ДИМИТРИА,

и о скорби Ольга Резанскаго и Олгерда Литовскаго, яко пойде Князь Димитрий на брань.

ВЕЛИКИЙ КНЯЗЬ Димитрий устроивши и розрядивши воинство, повеле перевозитися Оку реку, и запрети всем крепко, дабы идуще чрез Резанскую Землю ни единому власу не коснулися; а сам вземши благословение от Епископа Коломенскаго, перевезся Оку и оттуду пусти пред собою на трое сторожев противу Татарских сторожев, Семена Мелика, Игнатиа Креня, Фому Тину, Петра Юрскаго, Карпа Алексина, Петра Чирикова, и иных многих ведомцов; а за ними и сам спешил с братом своим и с всеми вои. Услышавши о сем Олег, Князь Резанский, яко Великий Князь Димитрий идет с великими силами противу нечестиваго Мамая, нача боятися, и помышляше послати к Князю Литовскому Олгерду; но не возможе, яко весь путь заступиша вои. Дивижеся, откуду Князю Димитрию помощь и дерзновение на Мамая; и известиша ему Бояре его, яко калугер именем Сергий в отчестве его сущий, прозорлив сый, вооружи его и даде ему на помощь двух калугеров своих. Тогда Олег раскаяся, яко воста на Великаго Князя Димитриа и рече: горе мне! погубих ум свой, не разумея градущаго времени. Бог поищет вины моей. Великому Князю боюся передатися, и к Мамаю приставши, стану гонителем на Веру православную и на братию, яко Святополк, и мене яко Святополка земля пожрет живаго. Молитва же прозорливаго Сергия поможет Князю Димитрию. Обаче тако сотворю: кому Бог поможет, тому обещание утвержду. Олгерд же собравши Литвы много, Варяг и Жмуди, пошел на помощь Мамаю. Пришедши же к Одуеву, егда услышал, яко Великий Князь Димитрий с великими силами пошел на Мамая, и яко Олег Резанский убояся, ста и удержася у Одуева и рече: прельстихся чуждаго разума слышащи: никогда Литва не бяше учена Князями Резанскими; а ныне Князь Резанский и мене обезумил и сам погибе. Зде убо ныне пребудем, дондеже услышим победу Князя Московскаго.

88.

О ПРИШЕСТВИИ ДВУХ БРАТИЙ

Олгердовичев на помощь Великому Князю Димитрию.

В ТО ЖЕ ВРЕМЯ СЫНЫ Олгердовы, Андрей Князь Полоцкий и Димитрий Князь Брянский, суще окрещенны в православную Веру чрез мачеху свою Княгиню Анну (чесо ради отец их Олгерд поганин ненавидел, но Бог любил их) послышавше, яко в великой печали Великий Князь Московский ради устремления безбожнаго Мамая, соболезноваху ему и они о том. Старейший же брат Князь Андрей посла к меньшему брату своему Димитрию тайную граммату, в нейже тако бяше написано: «веси, брате, яко нас отрину от себе отец наш Олгерд того ради, яко прияхом Веру православную: но Бог приял нас. Да подвизаемся же и до смерти за святую Веру, и пойдем на помощь Великому Князю Димитрию и всему Христианскому народу противо поганого царя Мамая». Прочетши то Князь Димитрий от брата своего умилися и с слезами рече в себе: даждь нам, Господи, благое и угодное тебе хотение совершити! и посла к брату ответ таков: «готов есмь, брате, с тобою ити с вои своими, их же имам в собрании ради Дунайских Татаров, и путь нам предлежит, брате, удобный чрез север к Дону, да и отца своего утаимся, еже не возбранил бы нам намерения нашего, и благовременно снимемся с собою и купно пойдем к Великому Князю Димитрию». По малех же днех снидошася желанно два брата, и якоже иногда Иосиф с Вениамином лобзашася любезно и потщашася с всеми своими воинствы ити к Великому Князю Димитрию, с ним же совокупишася вскоре не далече Дону, на месте нарицаемом Березуе. Великий же Князь Димитрий, видящи нечаемую

помощь, возрадовася, благодарящи Бога и о чудном его промышлении, яко дети оставивши отца своего, приидоша ему на помощь, и приемши их честно, многими удовли дарами, и рече им: не мене ради приидосте ко мне, но Господь Бог посла вас к нам в помощь Христианом против поганых, яко иногда Авраама Лоту, ему же вы истиннии ревнителие есте ныне. По сем Великий Князь посла вестники к Преосвященному Митрополиту Киприану, яко Князи Олгердовичи, оставльше отца своего, приидоша на помощь с многими силами. Митрополит же слышав то, прослезися и благодарение воздаде Богу, глаголющи: Господи, владыко человеколюбче! благодарим ти о толикой твоей милости, яко твоим промышлением и силою сопротивнии наши ветры на тихость прелагаются; и повеле в церквах Божественных везде молитвы творити день и нощь о Великом Князе и о всем православном воинстве, наипаче же в Обители Сергиевой, Святыя живоначальныя Тройцы, чая изрядныя в молитвах помощи оттуду. Великая же Княгиня Евдокия, слышавши то великое милосердие Божие, многим убогим милостыню сотвори, и сама хождаше всегда в Церковь Божию на молитву.

89.

О ПРЕХОЖДЕНИИ ДОНУ

и о взятии языка Мамаева.

ВЕЛИКОМУ КНЯЗЮ Димитрию приспевшу на место реченное Березуй, яко за двадесять поприщ от Дону, месяца Септемврия 5 числа, на память Святаго пророка Захарии и на память убиения сродника своего Святаго Глеба Владимировича, Князя Российскаго, се приехаша от стражей его Петр Горской и Карп Алексин, и приведоша языка нарочитаго от Мамая. Той язык поведаше, яко Мамай уже на Кузмине гати и не спешит того ради, яко ожидает Олгерда и Ольга, а твоего (рече) собрания не весть и стретения с тобою не чает. Князь же Великий вопроси его о силе Мамаевой, и отвещав язык рече: не можно есть никому силы его исчести. Князь же Великий нача думати с советники своими глаголя: зде ли пребудем, или Дон перевозишися имамы? и рекоша ему Олгердовичи: аще хощеши, Княже, войска крепка, вели чрез Дон реку возитися, то никто не помыслит назад; о силе же велицей Мамаевой не имамы ужасатися; яко Бог не в силе человеческой, но в правде благоволит. Ярослав бо перевезеся реку, Святополка победи. Прадед твой Князь Великий Александр Невский реку Неву прешед, Короля Свейскаго победи. Такожде подобает и тебе творити, Господа Бога на помощь призывая; аще и умрем за Веру святую и достояние Божие, то воздаяние от Бога вечное приимем. Сице и воинство свое укрепляй и сам мужайся. Витязей бо имаши много храбрых. Князь же Великий повеле войску своему за Дон реку возитися; а в том времени начаша вестники прибегати извещающе, яко уже близко бегают Татарове. Мнозии же Рустии сынове мужахуся и крепляхуся, радостно ожидающе подвига своего, желаемое видети. Зде же внезапу начаша являтися волки стадами, выюще безпрестанно, мнози вороны необычно слетешася и галки такожде и орлы от устья Дону в множестве великом прилетаху, и ту играющее клицаху, и лисицы с прочими зверьми собирахуся кличуще и ждуще грознаго дне, Богом изволеннаго на трупы. Тогда старейшии вои русскии радовахуся, неприятелей близко слышаще, совершеннаго же обетования и прекрасных венцов от Преподобнаго Сергия предреченных чающе; а юнейшии иныи унываху, видяще смерть пред очима, ихже старейшии укрепляху, да всячески дерзают, предлагающе им за смерть временную вечный живот, и за пленныя почести венцы неувядаемы Небесныя славы. И тако друг друга утверждающе и всячески сердце к брани исправляюще, дерзновенно с помощию Божиею устремляхуся противу нечестивых.

90.

О УСТРОЕНИИ ВОИНСТВ

к брани, о укреплении всех полков от Великаго Князя Димитрия и о молитве его.

ШЕСТАГО ЧАСА дня прибеже Семен Мелик с дружиною своею, по нем же гнаша Татарове даже до полков Руских, и увидевши великое воинство Князя Великаго Димитриа, возвратишася и поведаша Царю своему нечестивому Мамаю, яко Росстии Князие ополчишася при Дону в многом множестве воинств. Он же богопротивник разжегшися Диаволом, с великою яростию в погибель себе крикнул гласом страшным: таковая то моя сила! аще сим не одолею, то како имам возвратитися в своя си? и повеле всему своему поганому войску вооружитися. Мелик же прибегши поведа Великому Князю, яко Гусин брод прейдоша уже погании, едину точию нощь имамы межи собою, а утро имут приити на Непрядву; тебе же (рече) Великому Князю подобает днесь ополчитися, да не ускорят заутра Татарове. И абие Великий Князь Димитрий с братом своим и с Литовскими Князьми Олгердовичами нача полки уряжовати, наипаче от Литовския страны Воевода Димитрий Боброк, родом Волынец, вельми своих устроил чинно и благообразно. Уставленным же бывшим всем полком по достоянию, елико где подобает кому стояти, выехал Великий Князь с прочими Князьми на место высоко и увиде вси хоругви воинства Христианскаго, и яко вси полки стройно в бронях и шлемех от злата ясно светящися чинно розряжени и уставлены, и вси вои и богатыри Рускии всячески готовы и охочи на брань; Господу же Богу молятся о победе на врага. Сего ради удивися и возрадовася Богом укрепляющися. Такожде и Князи Литовскии почудилися и глаголаху: подобно тое войско Царя Македонскаго воинству; тако бо велико есть, яко пред нами не бяше. И абие Великий Князь ссевши с коня, паде на колену пред образом Христовым, написанным на хоругве черной большаго полку, и нача из глубины сердца молитися, зовый велегласно: о Владыко вседержителю Господи! виждь смирение наше, и призри милосердным оком на люди своя, иже твоею десницею сотворены суть и кровию твоею искуплены от работы Диаволи! внуши, Господи, глас молитвы моея и обрати лице свое на нечестивыя варвары, и даруй нам на них победу молитвами Пречистыя своея Матере и всех Святых, от века тебе благоугодивших! По молитве же вседе Великий Князь на коня своего и нача с прочими Князьями по полком ездити, коемуждо полку сам своими устами глаголя: братия моя милая, сынове Христианскии, от мала и до велика! днесь нощь приспе, а день грозный приближается; в сию нощь бодрствуйте, мужайтеся и крепитеся о укрепляющем вас Господе Иисусе Христе; пришел бо уже час вашего подвига; станите крепко противу неприятеля, иже близко уже нас на Непрядве реце. Господь же силен в брани, Господь заступник наш, Бог Иаковль, уповайте на Бога жива, да мир вам будет, братие. Воззрите на древняя роды и видите, кто убо верова Господеви и постыдеся? или кто призва Его, и презре и? зане щедр и милостив Господь, спасет во время скорби. Аз же заутра еще желаю с вами видетися; и сие рекши, отпустил брата своего Князя Владимира в верх по Дону в дубраву зелену, яко да на засаде с ним утаится полк его. Вдаде же ему и витязей много Двора своего, и отпустил с ним известнаго Воеводу Димитриа Волынскаго, противу живоноснаго праздника рождества Пресвятыя Богородицы. Осень же бе тогда долга, дние бяху еще летны и нощи светлы с воздушною теплотою. По отъезде Великаго Князя вси вои укрепльшеся во всяком единодушии и дерзновении, един за другаго умрети обещахуся, и вси единогласно горе сердечнии очи возводя зовяху: Боже святый! призри на ны и даруй православному Князю нашему победу, яко великому Царю Константину, и покори под нозе его врага того Мамая, яко же иногда кроткому Давиду Голиафа, и научай руце наши на ополчение и перста наша на брань, благословенный Боже во веки!

91.

О ПРИМЕТАХ ДИМИТРИА ВОЛЫНСКАГО

предувещание.

ЗДЕ ЧИТАЯ О ПРИМЕТАХ, да не помыслиши, любезный читателю! оныя военныя приметы быти вражбитства некая, или волшебства Богу и вере Христианстей противная. Ибо ино есть примета, и ино волшебство. Волшебство бо и вражбитство есть от Диавола, злобе всегда ходатайственно; примета же от искусства человеку бывает, в таковых случаях прилучившуся. Многажды же и от самаго Бога в пользу, или в наказание хотящее быти человеком предобъявляются различна предзнаименования не токмо на земли, но и на воздусе, яко рещи кометы и различные портенты и читаяй истории многа таковая обрящет, якоже и зде; того ради и предреченный Димитрий не на иного, но на самаго Бога, и на угодников его уповати и молитися увещевает, якоже речется в последующих.

Пришед Димитрий Волынец и рече Великому Князю: хощу искусити приметы своея; точию выиди сам со мною на поле Куликово; и послуша его Великий Князь Димитрий. Волынец ста в нощи посреди обоих войск своих и Татарских, и обратившися услыша от страны Татарския стук велик, аки торг некий собираем, или аки город зиждущися; созади же волцы выют вельми; по правой стороне орлове кличуще; и бысть трепет различных птиц велик зело; против же им враны аки горы вздымающеся; по реце де Непрядве гуси и лебеди крылми плещуще, необычну грозу подаваху. Рече же Волынец Князю Великому: слышите ли, Княже, что? и отвеща ему: слышу, брате, гроза есть велика. Рече же Волынец Великому Князю: обратися на полки своя, и слыши что есть? и бысть тихость велика; и рече Волынец: что слышасте, Княже? и отвеща Князь: ничто же, точию видех много зарей огненных снимающихся; и рече Волынец: огни добро знамение; призывай Бога неоскудною верою. Рече же паки Волынец: еще ми примета есть Княже; и ссевши с коня, паде на десное ухо, приник к земле и лежаше на долгий час, и востав абие пониче; и рече Великий Князь: что есть брате? он же не хотяше ему сказати; принужден же бысть, и сказа ему глаголя: едино есть на пользу, а другое скорбно. Слышах бо, Господине Княже, землю на двое плачущуся, едина страна поганым языком плакася горько чад своих аки вдова некая; другая же страна аки некая девица жалостно плачевный глас аки от свирели испущаше. Аз же, Великий Княже, множество тех приметов испытах; сего ради недеюся на Бога жива, яко силою его и помощию Святых мученик Бориса и Глеба, сродников ваших, будет победа тебе над погаными: но и войску Христианскому многое падение будет. Слышав же то Князь Великий, прослезися вельми, и рече: да будет побеждение Господне! Волынец же рече: Княже Государю! не подобает в полцех сего поведати, но токмо Богу молитися и Святых его призывати; и рано заутра вели всем подвизатися на кони своя, и всякому воину Крестом Христовым вооружитися; то бо есть непобедимое оружие на враги видимыя и невидимыя.