Юрий Звенигородский. Великий князь Московский

Ковалев-Случевский Константин Петрович

Подлинник документа хранится в РГАДА (Российском государственном архиве древних актов).

1. Грамота князя Юрия Дмитриевича великому князю Василию Васильевичу

А на сем на всем, брате старейший, князь великий Василеи Васильевич, целуй ко мне крест, к своему брату молодшему, князю Юрью Дмитриевичи, и к моему сыну, князю Дмитрею Меншому, и с нашим братом молодшим, князем Костянтином Дмитриевичем, и с моими братаничи, князем Иваном и со князем Михаилом Андреевичи, и со князем Василъем Ярославичем.

Имети ми тобя, великого князя, собе братом старейшим. А брату нашему молодшему, князю Костянтину Дмитриевичи), имети ему меня себе

братом старейшим. А князю Ивану да князю Михаилу Андреевичем имети им меня собе дядею. А князю Василью Ярославичю имети ему меня себе дядею жо. А добра вам мне хотети везде, во всем, где бы ни было. А что вам слышав о моем добре или о лисе от кого бы ни было, а то вы мне поведати в правду, без примышленья. А кто будет тобе, князю великому, друг, то и мне друг. А кто тобе недруг, то и мне недруг. А не канчивати ми без вас ни с кем. А хотя буду с кем в целованьи, и мне к нему целованье сложити. А вам так же без моего веданья не канчивати ни с кем. А держати ми тобя, великого князя, собе в старишиньстве. А тобе мене держати в братстве, и во чести, без обиды.

А детей ми своих болших, князя Василья да князя Дмитрея, не приимати, и до своего жывота, ни моему сыну меншому, князю Дмитрею, не приимати их. А тебе их так же не приимати.

А чем тобе благословил отец твои, князь великий Василеи Дмитриевич, своею отчиною в Москве, и Коломною с волостми, и всем великим княженьем, и Муромом с волостми, и Козельском с месты, и иными своими примыслы, так же что отчина брата нашего молодшего, князя Петрова Дмитриевича, Дмитров со всеми волостми, того ми всего под тобою, под великим князем, блюсти, а не обидети, ни вступатися, ни моему сыну, князю Дмитрею Меншому.

А что есмь взял царев ярлык на Дмитров, и тот ми ярлык тобе дати.

Так же что вотчина брата нашего молодшего, княжа Костянтинова Дмитриевича, и братаничев моих вотчина, княжа Иванова да княжа Михайлова Ондреевичев, и княжа Васильева Ярославича дедина и вотчина, и мне того под ними всего блюсти, а не обидети, ни вступатися, ни моему сыну, князю Дмитрею Меншому.

А чем мя благословил дед твои, князь великий Дмитрии Иванович, а мои отец, в Москве и в станех в Московьских, так же и пути в станех в Московьских, как ся есмь розделил с твоим отцом, с великим князем, а с своим братом, и Звенигородом с волостми, и Галичем с волостми и селы в великом княженьи, или что собе примышлю, или что ми ся еси нынеча отступил Сурожыка, да Лучиньского, да Шелковы, и Шачебала, и Ликурги, или что ми ся еси отступил из великого княженья Костромьских волостей, Андомы, Кореги, Борку, Березовца с Залесьем, да Шыленги, или что ми ся еси отступил Бежыцьского Верха, и с путми, и с селы, и слободами, опрочь тех мест, что еси подавал из Бежыцьского Верху брату нашему молодшему, князю Костянтину Дмитриевичи), да опрочь сел Ивановых Дмитриевича, что еси у него взял в своей вине, а иных ти сел в Бежыцьском Верее не держати, а отступил ми ся еси и моему сыну, князю Дмитрею Меншому, тех всех мест в вотчину и в вудел, а того вам всего подо мною и под моим сыном, подо князем под Дмитреем под Меншим, блюсти, а не обидети, ни вступатися.

А Бежыцьскои ми Верх ведати по старине, по тому, как был за тобою, за великим князем. А у кого будут в Бежыцьском Верее грамоты жаловалныи отца твоего, великого князя, или твои, у бояр, или на слободы, или у иного у кого, и в тех грамотах волен яз, князь Юрьи Дмитриевич, кого как хочю жаловати.

А жити ти в Москве со мною и с моим сыном, со князем з Дмитрием, как, есмь жил с твоим отцом, с великим князем, а с своим братом.

А дань и ям давати ми с своей отчины, и Звенигорода

с волостми, и з Галичя с волостми, по давному, как есмь давал твоему отцу, великому князю. А з Бежыцьского Верха и с Костромьских волостей давати ми дань и ям по тому розводу, как переже того давали дань и ям в твою казну.

А знати Орда тобе, великому князю, а мне Орды не знати никоторыми делы. А переменит Бог Орду, не имешь давати татаром, и коли учнешь имати дань с своей отчины, с великого княженья, себе, и мне тогды с своего удела имати дань собе.

А коли ти будет самому всести на конь против своего недруга, или ти будет брата нашего молодшего послати, князя Костянтина Дмитриевича, и мне послати сына своего с своими людми. А коли пошлешь братаничев моих или своих воевод, и мне послати с ними своих воевод с своими людми. А где ти будет надобе послати на свою службу сына моего, и сыну моему пойти без ослушанья с моими людми.

А кто имет служити мне, князю Юрью Дмитриевичи), а жывучи в твоей отчине, в великом княженьи, а будет ти слати ис тех городов на свою службу, где те жывут, и мне слати с теми людми своего воеводу с твоим воеводою.

А кто имет мою отчину обидети, и тобе мене боронити. А в Литву ти у мене помочи не имати. А к тобе ми не ездити.

А кто имет жити ваших бояр и слуг в моей отчине, и тех ми блюсти, как и своих. А кто имет жити моих бояр и слуг в ваших отчинах и в великом княженьи, и вам их блюсти, как и своих. А бояром и слугам межи нас волным воля. А городная осада, где хто жывет, тому туто и сидети, опрочь путных бояр.

А князей ми твоих служебных с вотчинами в службу собе не приимати. А который князи мне имут служити, и им в вотчину свою не вступатися, а вотчины лишены.

А который суды судил яз, князь Юрьи Дмитриевич, сидя на Москве, а тех ти судов моих не посужати.

А что ся учинило в нашем розмирьи, что поймана твоя казна, великого князя, и твоее матери, великие княгини, или поклажаи ваши, или бояр твоих поклажей, или инятцов твоих поклажей, или что будет меня того дошло, и мне то отдати по сему целованью. А что инятци твои на поруие подаваны, или на них кабалы пойманы, и мне с них велети порука свести, а кабалы им подавати. А что мои люди грабили бояр твоих, или инятцов твоих, или людей твоих, опрочь бою, ино то отдати, а не отдадуд, ино тому суд и исправа, опроче съестного.

А что будут поклажей моих бояр, Семеновы Федоровича или иных бояр моих, и что того тебе дошло, великого князя, и тобе то отдати по сему целованью. А что будут твои бояре и твои люди имали и грабили моих бояр и слуг в первое наше розмирье, и им то отдати, а не отдадут, а на то суд и исправа.

А что князь Василеи Ярославич имал мою вотчину или люди его грабили мою вотчину, а на то суд и исправа.

А что еси платил, в Орде за мою отчину, за Звенигород и за Галич, два выхода и с распанами, а о том ми с тобою розчестися, и чего ся не оточтусь, и мне то тобе подняти те выходы.

А суженое, положеное, заемное, поручное, кабалное по исправе дати. А холопа, робу, должника, поручника, беглеца, татя, розбоиника по исправе выдати. А обидному всему межи нас суд и исправа. А о чем ся судьи наши сопрут, ини собе третьего изберут в нашей отчине, в великом княженьи. А ис земли вон на третей ся не зовут.

А что есмь занял у гостей и у суконьников шестьсот рублев да заплатил есмь в твои долг в ординьскои Резеп-Хозе да Абипу в кабалы, и на кабалах есмь то серебро подписал, и тобе с мене тот долг, ту шестьсот рублев, снята. А с теми гостъми ведатися тобе, опрочь мене, самому. А мне тобе тех сказати, у кого есмь то серебро заимывал.