Молитвы и каноны, чтомые по усопшим
Шрифт:
Ирмос: Божия снизхождения огнь устыдеся в Вавилоне иногда, сего ради отроцы в пещи радованною ногою, яко во цветнице ликующе, пояху: благословен еси, Боже отец наших.
Припев: Святый мучениче Уаре, моли Бога о нас.
Яко же солнце, Господи, всех просвещавши, и всем дождь независтно изливаеши, и прогневающим Тя милость непрестанно даруеши, и ныне послушай Уара, Твоего страдальца, и пролей милость Твою до конца
Припев: Святый мучениче Уаре, моли Бога о нас.
Ныне, якоже и прежде, щедр буди, Господи, и умолен явися, Владыко, якоже о Клеопатре содея, сице и о нас, Милостиве, сотвори; посли Своя щедроты и милосердие ко еже нами воспоминаемым, Источник бо еси милости неисчерпаемый.
Слава: Аще пророк, восперяяся, поет милости Твоя, Господи, во веки, убо неоскудевша Тя в щедротах веруем, яко милосердия Твоего пределы неизмеримы, и от пучины во глубину потопшим излияти милости Тя умоляем, исполни убо ради мученика сие, о Владыко наш.
И ныне: Гору Тя сказует премудрый во пророцех, мы же тому и еже от Тебе Каменю Богородия изыти без примешения мужеска, веруем; Имже наше спасение и от глубин адовых возведение получихом, Владычице, возведи и днесь от ада воспоминаемыя нами, да Тя, Всемилостивую, непрестанно величаем.
Ирмос: Мусикийским органом согласующим и людем безчисленным покланяющимся образу в Деире, три отроцы не повинувшеся, Господа воспеваху и славослбвляху во вся веки.
Припев: Святый мучениче Уаре, моли Бога о нас.
Шары [7] да будут словеса древния Твоя, милости, Господи, сказующия и нашу надежду воздвижущия, яко послушал еси святыя Твоя, Господи, еже помиловати неверныя умершия, ихже и днесь приводим Ти на молитву, да прошения их ради ущедриши инославно умершия, ведением и неведением Тебе, Владыко, досадившия.
Припев: Святый мучениче Уаре, моли Бога о нас.
7
Шары – красочны, цветасты, живописны, изображении, явны.
Агнче Божий, Пречистою Своею Кровию нас искупивый, Феклино и блаженнаго Григория моление услышав, Мефодия со многими и Макария прием прошения, и отраду, и избаву зловерным подав умершим, и Златоустаго о сих молитися написати воздвигнув, приими убо, Владыко, с сими славнаго Уара и молитвами их воспоминаемыя от нас прости и помилуй.
Слава: Радость нам изпроси, великомучениче, возвесилимся бо, аще обрящем твоими молитвами избавленныя от вечных мук наша сродники; всегда бо твоя молитвы Владыка слышит и прошения исполняет, ты же убо не оскудей о сих и ныне моляся, да тя выну прославляем.
И ныне: Пренепорочная Владычице, обилуй множеством
Ирмос: Ужасеся о сем Небо, и земли удивишася концы, яко Бог явися человеком плотски, и чрево Твое бысть пространнейшее Небес, тем Тя, Богородицу, Ангелов и человек чиноначалия величают.
Припев: Святый мучениче Уаре, моли Бога о нас.
О Бозе да возможеши, Уаре славный, Богоприятными твоими молитвами восприяти и излияти милости, яже до конца оныя отчужденным, Един бо есть щедрот и милосердия Родитель, и вся Ему возможна яко Владыце, к Нему же неотступно, страдальче, молися простити и помиловати яже от нас воспоминаемыя.
Припев: Святый мучениче Уаре, моли Бога о нас.
Дело соверши предивно, о великомучениче, и славе твоей прикладно, еже от Господа прощение и праведнаго Его гнева пременение испросити огорченным темнаго зловерия ради нашим прародителем и еже сих, в горести и во ожидании лютейших сущих, да возмеши в безстрашное избавление, идеже веси Владыка прощенный положити.
Слава: И кое убо чудо явится сего дивнейши, кая слава знаменитейши, и кое милосердие таковаго больши, аще ты, мучениче, сожалев, умолиши милостиваго Господа отпустйти грех нечестия яже от нас поминаемых, и лютаго томления оных избавити.
И ныне: Владычице милостивая, человеколюбивая и зло не помнящая, приими жалость нашего прошения и ходатайствуй неотступно о милости к милостивому Твоему Сыну и Владыце, еже помиловати и простити грех инославия умершим сродником нашим и яже с ними помянутым, отпущение и место сим милости неотъемлемо подати.
Панихида для чтения мирянами дома и на кладбище
Молитвами святых отец наших, Господи Иисусе Христе Боже наш, помилуй нас. Аминь.
Святый Боже, Святый крепкий, Святый безсмертный, помилуй нас. (Трижды)
Слава Отцу и Сыну и Святому Духу, и ныне, и присно, и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне, и присно, и во веки веков. Аминь.
Отче наш, Иже еси на небесех, да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй. (12 раз)
Слава Отцу и Сыну и Святому Духу, и ныне, и присно, и во веки веков. Аминь.