Творения
Шрифт:
Глава 14. О послании архимандритом в Казань святаго отца Варсонофиа, Казанскаго чудотворца, и о создании от него обители боголепнаго Преображения Христова.
И повелеваемь бывает благочестивым царем, и святителем, быти архимандритом боголепнаго Преображения Господа и Бога и Спаса нашего Iсуса Христа, и составити обитель новую в новопросвещенном граде Казани; еже и бысть: Христовою благодатию, и по благословению преосвященнаго Гуриа архиепископа, монастырь сооружает, и церкви созидает, и келлии поставляет, и до ныне убо Богом соблюдаем младеет и распространяется, яко древо при водах благолиственно и доброплодно; приносит же убо не яко древо тленен плод и единем временем кончающся, но нетленен и безконечен плод, от негоже и хвала Творцу возсылается: святыя, глаголю, святители и преподобныя монахи, ихже имена в книгах животных написана суть. Да не зазрит ми кто о словеси сем: видех бо во святей обители сей, не токмо сих святых телеса нетлением почтени от Бога, но и монаси и мирстии нетленни мнози обретошася, еще же и святаго града Иеросалима благоволи Бог святому мужу и преподобному Епифанию, архиепископу монастыря святыя Голгофы, в той же честней обители положитися. К преподобному же святителю Гурию Варсонофий архимандрит имяше во всем послушание, и духовный союз, и любовь нелицемерну, и во всем повинуяся и совопрошаяся, и с молитвою и со благословением его вся творяше; постом же и молитвою, и слезами и бдением, и всенощным стоянием тело свое удручая; ношаше же преподобный Вароонофий и вериги на теле своем, никомуже ведущу. И бысть во всем образ братии к добродетели, монахи наставляя, и мирския поучая, и неверныя приводя во Христову веру, бе бо, якоже и преди рекохом навык писанию срацынскому, и мухамедова скверная
Глава 15. О поставлении во епископство блаженнейшаго отца Варсонофия славному граду Тфери.
Потом же Божиим смотрением, по повелению самодержца государя царя и великаго князя Иоанна Васильевича всеа России, в лето седмь тысящь седмдесять [35] Афанасием, митрополитом Московским и всея России, поставляется на епископство славному граду Тфери, на Акакиево место преподобнаго епископа, сему убо ко Господу отшедшу: жившу на епископстве сорок лет, и добре Богу угодив, преставися. Сему же преподобному Варсонофию еще диакону сущу у преподобнаго Акакиа живущу ему, якоже сам поведа учеником своим, и многащи к нему Акакию глаголати, за многая лета преставления своего: яко быти тебе, рече, Варсонофие, зде Тфери епископом по моем к Богу отшествии и правити люди Божия; еже и бысть. И добре пасяше словесное стадо Христовых овец, паче убо и паче протяг усердие к подвигу, и множа умножи талант господина своего, и пребывая в посте и молитвах, и слезах, и во всенощном стоянии молитву принося выну к Богу. И прият от Бога благодать разсуждения; разсуждение бо, рекоша отцы, корень всем добродетелем. К сему же и врачебней хитрости преподобный Варсонофий искусен бе, и во имя Господне многия болящия телесне уврачева, еще жив сый, мзды же не приемля, якоже и прежнии святии врачеве не приемляху мзды, но туне врачеваху: кая бо потреба, рече, та стяжати, яже не можем с собою взяти; болных же паче врачеваше Духа Святаго благодатию душевныя страсти, врачь бо бе искусен по Господни благодати обоим сим врачеваниемь; псалмы же Давыдовы непрестанна бе молитва к Богу из уст его; ручное же бе ему делати клобуки гречестии, еже ношаху святителие; то бо делаше, и посылаине братии своей, и моляше их молити о нем Бога, то бо бе за рукоделие нетленная мзда ему.
35
Здесь в рукописи пробел.
Глава 16. О преставлении преблаженнаго великаго архиереа Варсонофия, епископа Тферскаго, Казанскаго чудотворца.
Егда же бе преподобный Варсонофий во глубочайшей старости, оставляет паству, и преселяется паки в созданный им монастырь, во обитель боголепнаго Спасова Преображения, ея же сам состави, в ново просвещенной град Казань; и паки касается делу своему, емуже бе обыкл, угождая Богу постом, и молитвою, и бдением, и милостынею, и всенощным стоянием, и труды ко трудом прилагая; и возлагает на себе великий образ. Скорбию же многою преподобный и болезнию дряхлствуя другим бываше, правила же своего не пременяше никогдаже; к церковною пению старости ради и многих ради болезней не можаше уже ходити, но ученицы его к церкви вожаху его на колесцах, дондеже изнеможе зело, и нача конечно болети; и познав от мира сего отшествие свое к Богу, и причастився божественных и животворящих Христовых Таин, отъиде ко Господу, егоже возлюби. Преставися же преподобный Варсонофий, епископ Тферский, в лето 7084 [1576], априлия месяца 11 дня, на память священномученика Антипы, епископа Пергама Асийскаго, и погребен бысть честно в созданем от него монастыре, боголепнаго Спаса Господня Преображения, архиепископом Тихоном первым, по числу же пятым, близ преподобнаго Гуриа архиепископа. Тогоже лета, иуниа в 14 день, архиепископ Тихон ко Господу отходит, и повеле положити себе в монастыре святыя и живоначалныя Троицы, иже внутрь града Казани близ двора архиепископля. И о сем до зде.
Глава 17. Месяца октовриа в 4 день сказание о обретении мощей, иже во святых отец наших, Гуриа перваго архиепископа Казанскаго, и епископа Варсонофиа Тферскаго, Казанских чудотворцов, в лето 7104 [1595].
Божиим изволением, повелевает благочестивый государь царь и великий князь Феодор Иоанновичь всея России самодержец в монастыре воздвигнути церковь каменну боголепнаго Спасова Преображения. И егда начаша рвы копати, тогда гробницы каменныи, иже беша над гробы святых, преподобнаго Гуриа архиепископа Казанскаго, и Варсонофиа епископа Тферскаго, повелеша сняти, золожена бо бе новая церковь болши первыя; и егда доидоша до целбоносных гробов преподобных отец, октовриа в 4 день, тогда поведаша мне смиренному. Нам же со всем освященным собором принесше Господу Богу безкровную жертву, и певше панихиду, и шедше в монастырь, приидохом на место, и поклонихомся нетленным гробом преподобных отец Гуриа и Варсонофиа. И вскрывше гроб Гуриа архиепископа, и видехом дивно, еюже не надеяхомся, рака бо бе святаго полна благоуханна мира, мощиже святаго Гуриа оки губа ношахуся, части же ни единой погружене бывши: нетлением бо одари Бог честное и многотрудное его тело, яко и ныне зрится всеми, токмо мало верхния губы тление коснуся, протчия же уды его целы быша; мне же недостойному многогрешною моею рукою святаго телеси коснувшуся: святое же тело его бе плавая; осязахом же и погребалныя ризы его, и бяху крепка зело; покусихомся же и мантии его, и прочей погребалной одежды его зелно потягнути, и быша новых крепчае; в главах же у преподобнаго Гуриа лежаше клобук греческий вязен недовершен, о немже поведают Варсонофиевы ученицы, яко той клобук делаем бе преподобным Варсонофием преосвященному Гурию архиепископу, и егда Гурий архиепископ преставися, тогда Варсонофий положи во гроб Гурию в возглавие клобук той не довершен; нам же соборне смотрившим клобук той, и едину прядь из него вземше, и едва преторгнуша, всяко бо новаго крепчае бе; благоуханное же честное и святое миро устроиша в сосуд нов; православнии же христиане, монаси и мирстии, и жены и младенцы, мажущеся святым тем миром, исцеления неоскудна приемляху. Потом же открыхом раку преподобнаго Варсонофиа, и видехом многим нетлением почтени от Бога мощи святаго Варсонофиа, к ногам же преподобнаго тление коснуся, но обаче не токмо кости неразрушены, но и крепки бяху зело, и никакоже слабости в составех имуще, якоже и Гурию святителю, своими бо руками с Арсением архимандритом святыя их и чудотворныя мощи преложихом от гробов в ковчеги, и погребалныя ризы, такожде яко и Гурию, преподобному Варсонафию новых крепчае. Мы же неизреченному человеколюбию Божию дивящеся, со слезами и радостию певше надгробная над преподобными отцы, и поставихом их на верху земли, да вси приходяще видят, и дивящеся славят Бога, прославляющаго святыя своя, и целуют с верою честныя и святыя их мощи. Два же монаха Иона и Нектарий, иже к Гурию архиепископу веру несумненну держаста, и во единой гробнице положистася с ним, о нихже прежде речено бысть, тии такожде многим нетлением почтени быша, и ризы их не истлеша; и над сими такожде надгробная певше, земли предахом. Возвестихом же о сем государю царю самодержцу великому князю Феодору Иоанновичу всея России, и святейшему Иову патриарху Московскому и всея России, писанием со архимандритом Арсением тояжде святыя обители. Святый же царь, и святый патриарх, и весь царский синклит, и множество благочестивых воздаша о сем славу Богу, яко неверныя люди в веру привели, и устроили веровати, и покланятися единому в Троице славивому Богу, и святым крещением просветили, и яко неплодную землю, доброплодну сотворили, и в Троице славимый Бог преподобных сих святителей нетленны показа. Благочестивый же самодержец, и святый патриарх, повелеша хранити честныя их и многотрудныя и многоцелебныя мощи на верху земли; и у болшия церкви, со южныя страны олтаря, повелеша церковь создати, и ту поставити мощи святых отец наших Гуриа и Варсонофиа, еже и бысть. Болшая же церковь благолепнаго Спасова Преображения, милостию в Троице славимаго Бога, и молитвами Пресвятыя Владычицы нашея Богородицы и преподобных отец наших Гуриа и Варсонофиа молитвами, изрядна и прекрасна лепотою устроися о пяти главах, величеством же и красотою малым чим недостаточествует церкви Пресвятыя Богородицы, честнаго и славнаго ея Одигитрия, иже в девичи монастыре в Новом, близ царствующаго града Москвы. Егда же убо благоволением
Конец житий святых чудотворцов казанских.
Источник: Твороенiя святейшаго Гермогена, Патрiарха Московскаго и всея Россiи. С приложенiем чина поставленiя в Патрiарха. — Изданiе Церковной Комиссiи по чествованiю юбилейных событiй 1612, 1613 и 1812 годов. М.: Печатня А. И. Снегиревой, 1912.
– с. 35–51.
Обретение честных и многоцелебных мощей иже во святых отца нашего Алексия, митрополита Киевскаго
Месяца мая, во 20-й день.
Обретение честных и многоцелебных мощей иже во святых отца нашего Алексия, митрополита Киевскаго и всея Русии чудотворца. Слово вкратце.
Списано же бысть обретение Гермоном Патриархом. [36] .
В лета благочестиваго и христолюбиваго самодержда Русския земли, великаго князя Василия Васильевича всея Русии, при святейшем митрополите Фотие Киевском и всея Русии. Егда восхоте Бог болма своего угодника прославить, светильнику не под землею быти, но всеми-же видиму быти. Случися и се по некоему строению Божию. Церкви обвалившеся весма во время божественныя Литургия; священником еще во алтари. Но благодатию /л. 358 об./ Христовою и молитвою угодника его Святаго Чудотворца митрополита Алексия вси невредими сохранени быша. И тако тоя место очистивши, хотяще паки воздвигнути новую церковь. И начаша копати рвы во основание церкви, и абие обретоша тело блаженнаго Алексия цело и невредимо, и ризы его не истлевша. О, превеликое чюдо! толиким летом поминувшим и святому во гробе лежащу — не изменися святое его тело и ризы его, яко вчера оболчены; понеже убо да сбудется реченное Богом во святом Евангелии — не может град укрытися верху горы стоя, и никтоже, вжег светильник /л. 359./ поставляет его под спудом, или под одром. Такоже и саму светильнику не мощно на толико лет сокровену быти под землею; се же все бысть премудраго Бога промышлением. Яко же слышано бысть Святаго обретение, и се слышавше благоверный и христолюбивый князь Василий Васильевич и вси благовернии князи — приидоша скоро на дивное чюдо и на обретение тела Святаго и при святейшем же Фотии, митрополите Киевском и всея Руссии, и с ним же епископы и прозвитеры, весь чин церковный приидоша со псалми и пением и свещами и с кандилы хвалу велию воздающе всемогущему Богу /л. 359 об./ и угоднику его Чудотворцу Алексию. Народи же московстии мнози с радостию стекошася видети честное и святое его тело. Пришед же благоверной и великий князь Василий Васильевич всея Русии и вси благовернии князи — видевша таковую славу Божию и поклонишася Святому и божественному его телу преподобнаго отца нашего Алексея и возрадовася радостию великою зело; и, вздохнув из глубины сердца, глаголя: хвалю и славлю Тя Господи Боже мой и Пречистую и Непорочную Твою Матерь, яко сподобил мя еси раба твоего в моя лета видети таковое сокровище и благости /л. 360./ державы моея явити ми. Якоже убо дал еси нам вторый источник благодатный во граде нашем Москве, творящая нам, дивныя чюдеса последнему роду нашему, не токмо же единому граду нашему, но и всем градом и страном с верою притекающим. Но и такова дивная чюдеса и дары милости Твоея получити, Владыко, уже ничим же охужен есми Божия благодати от всех Святых мужей. О, Предобне Святителю наш, Чудотворче Петре, и Святителю Христов, преподобне отче наш, Чудотворче Алексею! не престайте вкупе к Богу молиста за ны и за вся верныя рабы своя; вы бо еста скорая /л. 360 об./ помощника и заступника земли нашей Рустей и стена необоримая присному граду нашему Москве. Великий же христолюбивый князь и вси с ним благовернии князи и боляре и вельможа их и вси московстии народы целоваста святое его тело любезно. И по сем церковь воздвижена бысть, зело прекрасна, Богу на се поспешествующу. И святаго тело в раце положиша в пределе честнаго Благовещения Владычица нашея Богородица, на десной стране, идеже суть видими святыя его мощи и доныне, всем исцеления обильно подающе; принесены же быша мощи его месяца мая в 20 день, на память св. мученика Фалилея, да не умолч/л. 361./ано будет истина, и да речено будет праведное: Елма бо обаче Бог не токмо в животе прославляющих его прославляет, но и по смерти явлену быти многими различвыми чудесы, о них же да речется мало от многих.
36
Подлинник находится в рукописи Московской Синодальной библиотеки, № 802, представляющий из себя собранiе житий святых, так называемые Милютинскiе Четьи Минеи. Рукопись в 4 листа. хорошо сохранилась. Сказанiе об обретенiи мощей Св. Алексия помещено в месяце Феврале, от 358 л. и след. Рукопись XVII в., Милютинские Четьи Минеи, как известно, датированы: они писались от 1646–1654 г. (См. Библиографический Словарь и черновые к нему материалы П. М. Строева. Изд. под ред. А. Ф. Бычкова. Спб. 1882 г. стр. 140).
Чюдо 1-ое св. Алексия, новаго Чудотворца, о испустившем ума.
Некоему человеку, именем Тимофею, ума ему испустившу до толика, яко не ведети ему, камо и откуда грядет; иногда же и вопрошающу ему, камо идти. Но убо Богу хотящу явити чюдеса и прославити угодника своего, во ум ему тако вложи: молитися некиим — довести его в монастырь архистратига Мих'aила. /л. 361 об./ Бывшу же ему тамо и гроб св. Чюдотворца Алексия видевшу, и абие в себе бысть; и яко от некоего сна возбудившуся ему и бысть здрав и смыслен Благодатию Христовою и молитвами св. Алексия, яко ничтоже пострадав, и отъиде хваля и славя Бога, и благодать велику исповедуя его угодника, яко его ради молитв помилова его Бог, такоже и человецы, иже прежде видящи его. Не чувственна и ничтоже ведущу, такоже, яко единаго от человек мысляща, такоже и те, и славу воздаяху Богу, творящему Богу дивная святым своим.
Чюдо 2-е о умершем отрочати.
Ниже се да умолчано будет. /л. 362./ От чудес св. Алексия, не токмо стяжавша дар от Бога его же немощных исцеляти, но и мертвыя воскрешать. Яко же прилучися болевшу некоему отроку, именем Димитрию. Сему от зельныя болезни изнемогшу умрети. Принесоша же его в погребатальных ризах во время Литургия поющу и свершившеся божественной Литургии. И изшедшим же братиям из церкви архистратига Мих'aила в трапезу ясти, того же отрока оставивше у раки св. Алесея. Родителя пришедша, хотяще его погре(б)сти. Бяше же отроча третьим летом суще, влезоста-же в церковь /л. 362 об./ — священницы и родители его, хотяше нести ко гробу, и обретоста отрока жива суща. И радости же велия исполнишася. Взем отроча живо и возвратишася в дом свой, славяще Бога и угодника его, Алексия.
Чюдо 3 е о разслабленном.
И иному же паки человеку, Андрею именем, родом же града Мурома, многими времены разслаблену, ему лежкащу на одре, и принесоша его на носилицах в церковь архистратига Мих'aила, люте сему тако страждущу. И положиша его близ раки Святаго и абие, исцеление получив, отъиде; его же в мале прежде чуждыми /л. 363./ руками принесена — сей на своих ногах здрав в свой дом возвратися, велику славу воздая Богу и его угоднику Святому великому Алексею.
Чюдо 4-е о крилице о Мих'aиле.
Ниж'e се да умолчено будет. Содеянное Святым некоему же мужу славну в граде том, именем Владимер. Воздвигшу ему церковь Воздвиженья Честнаго и животворящаго Креста. Крилику же тоя церкви, Мих'aилу именем, уязвлену ему бывшу от некоего стрелою, тем же и к язве той лют недуг приразися. И сему тако страждущу и многи дни в язве той пребывающу, яко и живота ему отчаятися, и возопи же /л. 363 об./ глаголя: несите мя ко гробу Святого Алексея, яко да отнесут его в монастырь св. Архистратига Мих'aила, к чудотворному гробу святого Алексея. Они же, послушавше его; отнесен же бысть четырми, ни чесом же ему владущу: принесше его и полижиша близ раки богоноснаго отца Алексея — начаша пети божественную Литургию. И абие оному клирику видится Святый Алексий промежду обою раму у священнику стоящу и святый потыр в руце держащу, и якоже виде и возопи велиим гласом: Святый Алексие помилуй мя! Они же запрещаху ему молчати. Он же множае /л. 364./ вопияше: Святый Алексий, помилуй мя! Святый же Алексий к нему обратився, яко Христово се рек слово: возми одр свой, иди в дом свой. И от того часа больный исцеление получи; видим же паки блаженнаго онаго чудотворца возлегшаго во своей раце. Возставше же в той час здрав бысть, яко ничтоже пострадав. Видевше же священницы скорое мужа исцеление, начаше молебен пети блаженному чудотворцу Алексею. Того же часа той исцелевший клирик, вземша книги своима рукама, и начат конархати Святаго канун. Видевше же вси, ту бывшее вскоре чудо, и прославиша /л. 364 об./ Бога и угодника его чудотворца Алексея.