Вирши

Полоцкий Симеон

ВЛАСТЬ

Всякая власть от Бога, он бо благи дает властелины. А злыя за грех попущает. Весма убо должно есть власти почитати и в благих велениих им не пререкати. Противник бо сый власти Богу ся противит, за что Господь отмститель, иже благих живит.

ВОЗДАЯНИЕ ЗЛОЕ

Василий святый [465] хотя честь воздати Иулиану [466] , умысли послати хлебы ячменны три, яже имяше и сам во пищу плоти приимаше. Посла усердно, чая благодати, но злый отступник зле тщася воздати, посла бо за то Василию сена, рек: «Се за ячмень буди ти премена: скотску ты пищу ячмень дал нам еси, скотску и от нас сено в мзду отнеси». Святый же отец сице отвещаше: «Что сами ямы, то бысть тебе наше приношение. Ты же воздаеши весма снедь скотску, из нас ся смееши», Подобие мир сей обыче творити, за дары честны худыми дарити. Кто ему службу и дружбу являет, многожды вражду во мзду познавает или тленныя вещи, точны сену, миролюбивым

дает во замену. Не тако Господь-Бог нам содевает: за дары худы благия воздает. За временныя — вечныя на небе, убо даяти дары ему требе. Не хощет он их, но нам есть полезна, сице бо стяжем царствие небесно. Не хощет даров Бог,— но воли благи, та с чистым сердцем дар ему предрагий. Тем же две цате [467] нищыя вдовицы Христос приял есть над многи златницы: усердство ея изволили прияти, паче богатых ей похвалу дати.

465

Василий святый...— Василий Великий (ок. 329—379), ранневизантийский церковный деятель, мыслитель и писатель.

466

Иулиан — очевидно, Юлиан Отступник — с 361 по 363 г. византийский император и философ, пытавшийся возродить язычество.

467

Тем же две цате...— цата — небольшая серебряная монета, имевшая хождение в Древней Руси. Здесь вспоминается эпизод из Евангелия, смысл которого заключается в том, что истинную ценность имеет не то, что дорого и много, а то, что идет от сердца (Марк, XII, 41—44).

ВОЗДЕРЖАНИЕ

3

Воздержание от брашн малу ползу деет, аще друга своего снедати кто смеет.

9

Аще не тщится игрец натягати струны во гуслех, та не может дати сладкаго гласа: тако силы тела невоздержанна не дают весело Богови гласа, убо сохраните воздержание: тем Богу служите.

ВОИН [468]

1

Воин, аще оружий свойственных лишится, удобь от супостата своего язвится. Тем же добродетелей и нас враг лишает, яко оружий, потом грехми убивает.

2

Филопатр воин храбрый хром ногама бяше, Арист аки некогда его осмеяше [469] . Но он рече Аристу: «Ты — сердце лишенный на брань, тем же человек не си ты военный».

4

Лев, егда ходит, ногти сопрятает, разве на корысть тех употребляет. И воин мечь свой должен сопрятати, токмо на враги извлечен держати.

468

Цикл состоит из 5 стихотворений.

469

Филопатр воин храбрый хром ногама бяше, Арист аки некогда его осмеяше...— по-видимому, имеется в виду высмеивание Аристом из Афин — академическим философом (I в. до н. э.), другом Цицерона и учителем Брута — египетского царя-отцеубийцы Птоломея VI (конец II — нач. I вв. до н. э.).

Филопатр (греч.— «любящий отца») — насмешливое прозвище Птоломея.

ВОЛЯ [470]

2

Самоволен человек Богом сотворенный и никогда от него бывает нужденный. Огнь и вода пред лицем нашим положися, что ти годе явися, к тому обратися. Обаче ко благому Господь увещает и различными средствы от зла отвращает. Самоволству без вреда выну всяка сущу, ни мала насилия от Бога имущу. Блажен же человек есть, аще изменится от злыя воли и на благу преложится. Ту бо ся спасение наше начинает, егда воли годное зло ум отвергает. И елма о том слезы будут источенны, о нем же прежде быхом зле возвеселенны. И противне, егда то потщимся любити благо, его же воля не хотет творити. И еще презерахом, возхощем искати и, его же гонзахом, добро будем гнати. Си измена есть Бога щедраго десницы ходатайством Марии, небесне царицы. О пресвятая Дево, изволи молити, дабы в сей прежеланней нам измене быти. Да не еже аз хощу произвожду в дело, но Богу волю мою да подчиню цело, еже ему есть годе, то бы ми творити, а свое хотение зло искоренити.

470

Цикл состоит из 2 стихотворений.

ВРАЗИ ТРИ

Кийждо человек врага си имеет, иже пакости в пути ему деет: мир, плоть и демон обычно стужают, рай заключают. Торжище кратко, в пути беда многа, нужда есть сладость Божия чертога. Кто ж ту хищает, нужду деяй себе, вселится в небе.

ВРАЧЬ [471]

Врачь, аще сечет, палит, досаждает, страдалец любит и мзду ему дает. Душевна паче требе есть любити, хотяща язвы смертныя целити: аще и жесток негли ся являет, та бо жестота смерти избавляет.

471

Просветитель Симеон Полоцкий часто популяризировал в стихах медицинские и естественнонаучные знания.

ВРЕМЯ [472]

6

Быстрая река бреги подмывает — время жизнь нашу выну сокращает.

7

В кое время исправа жизни не творится, то яко погибшее тебе да вменится.

ВЕРЕНИЕ [473]

1

Легкость есть скоро верити всякому. Злоба же — веры не яти никому.

2

Веру емлем тым паче, яже око видит, нежели гласом, яже ухо наше слышит.

472

Цикл состоит из 8 стихотворений.

473

Цикл состоит из 2 стихотворений.

ГАДАНИЕ

Рыбарие

Омиру [474] гадание даша, яко славну поету, ответа ждаша. «Что либо емлем,— реша,— то все оставляем, а его же не емлем, с собою ношаем». Он много мыслил время, не може познати и на то гадание им ответа дати. Нача быти печален и зело гневася, во срам себе считая: и тако скончася. Оле славолюбия! — коль зело тужаше о недомыслии си, даже смерть прияше. Бе же рыбарей дело; червие ловяху, пристающее кожа, и, емше, вергаху. А еже кожи ятся, того не ловиша, обаче то по нужде при коже носиша. Одела безделнаго! Яко человека мудраго гаданием есть лишило века.

474

Омир — Гомер, предполагаемый автор «Илиады» и «Одиссеи», греческих эпических поэм VIII—VII вв. до н. э.

ГЛАВА МЕДНАЯ ГЛАГОЛАВШАЯ [475]

Алверт великий [476] муж премудрый бяше, тайны естества преискусно знаше и художеством из меди состави главу, и хитрость дивну в ней постави: глас, человечю точный, издаяше и аки живый глагол изпущаше. Но той же Алверт послал бяше Фому, иже с Аквина [477] , до своего дому в некоей нужде. Иже елма вниде в дом его и ту дивну главу виде. Воздухом вшедшим глава подвиженна нача вещати, яко устроенна. Он же, непщуя чародейство быти, потщася главу млатом сокрушити. О чесом взем весть Алверт преученый? — о тщете дела бысть преоскорбленный. И рече Фоме: «увы, мне грешному! что ты содея трудолюбивому?! — в едином часе глава сокрушенна, яже чрез лета многа бысть строенна». Тако многажды и мы содеваем; труд многолетный в часе погубляем. Чрез долго время прилежим искати, благодать Бога всещедра стяжати, а потом, егда в грех смертный впадаем, о единой черте ону погубляем. Тогда праведно увы глаголати, о превелицей тщете благодати. Но уне ону прилежно хранити, дабы никогда ея погубити, ибо по тщете трудно стяжати, да тщимся убо крепко ту держати.

475

По мнению А. И. Белецкого, в основе стихотворения — рассказ из сборника латинского проповедника М. Фабера (см. Билецький О. И. Стихотворения Симеона Полоцкого на темы всеобщей истории. Зибрання праць у 5 томах. Киив, 1965. Т. I, С. 467).

476

Алверт великий — Алберт Великий, Альбрехт Больштедтский (1193—1280), ученый схоласт, алхимик, великий энциклопедист европейского средневековья, автор нескольких трактатов по натурфилософии. Особой известностью пользовалась его книга «О таинствах женьских, еже о силах трав, камений, зверий, птиц и рыб», переведенная в 1670 г.

477

Фому... с Аквина — Фома Аквинский (1225—1274) — средневековый христианский теолог, мыслитель, основоположник так называемой второй схоластики.

ГНЕВ [478]

6

Трегубо человетцы гневливы бывают, якоже философи о сем возвещают. Первый есть вид гневливых, иже наречени острии, а втории горции вменени. Третий же — труднии, вси гнев проявляют, но различнии нрави в гневе их бывают. Острии, иже скоро во гнев распалятся, но абие от того сами отрезвятся. Сей вид гнева блажайший, яко проявляет, что человек во сердце своем заключает. И ничто же обыче в себе утаяти, отмщения никогда мыслит содевати. Сего врачевство кротость, та бо угашает пламень, иже от гнева воспален бывает. Холеритци обычно сим гневом ярятся и врачеством кротости от того целятся. Горции наричутся, иже долго время носят в сердцех и таят тяжко гнева бремя. Суть же и в себе самех зело огорчени и ко ближним такови ж бывают явлени. Сей мелянхоликове вид гнева имеют, а возвеселитися никогда умеют. Врачество сего вида тихость быти может, та противу горести изрядно поможет. Труднии во гневе си речении бывают, иже зачата гнева никогда лишают, дондеже отмщение оным сотворити, сему во христианех не лепо есть быти. Сей благоговейнством токмо ся смиряет, аще того лишится беды содевает. Вы, братие, во гневе умни пребывайте, без гнева несть леть быти, но не согрешайте. Гневайтеся на злобы, тыя истребляйте, а озлобившыя вы удобно прощайте, внегда им каятися. Паче же любите злая вам сотворшия и благо творите: за то бо ко милости Бог ся преклоняет, согрешения наша скоро оставляет.

478

Цикл состоит из 6 стихотворений.

ГОД ВЕКА ОБРАЗ

6

Годищное поприще образ нам бывает, како век свой комуждо жити подобает. Весна есть образ детства. Ибо отребляют вредная в ея время, ветва прицепляют полезныя к древесем. Во оградех сеют, хврастие исторгают: да благая спеют. Тако во время детства нужда истребляти нравы злыя, благия же в сердцах насаждати. Лето лучесы палит, вси же ту трудятся, траву косят, жнут класы, различно томятся. Тому юность подобна до мужеска века, ибо та страстми палит бедна человека. Юже хотящу в себе добре угасити, плоть трудами многими нужда есть томити. Есень плоды приносит, люди насыщает, в мужестем веце сущым точне подобает благих деяний плоды обилно носити, государству и дому всеполезным быти. Зима снегом всю землю белым покривает, человек готовыми брашна ся питает. Тако старость белыми покривает власы главу и ознобляет тело в своя часы. И плоды трудов бывших нуждает снедати: что кто в юности постла, на том имать спати. В зиме кождо ко огню рад ся приближает, в старости к молитве огню всяк да притекает. Тех теплотою может душу си согрети и яко лебедь слатко с Симеоном пети [479] : «Ныне отпущаеш раба си, Владыко, с миром. Приими дух мой в царство ти велико».

479

...яко лебедь слатко с Симеоном пети — образ поющего лебедя (символ христианского служения Богу) сопоставлялся с образом Симеона Богоприимца, молитва которого «Ныне отпущаеши...» (Лука, II, 29) цитируется в стихотворении.